Отдел культуры,
молодежной политики и спорта

Информация о материале

Опубликовано: 13 мая 2024

Ветерандардыҥ конкурсы Јеҥӱниҥ 79-чы, аймактыҥ јаан јаштуларыныҥ Совединиҥ 55 юбилейлик јылдыктарына, Билениҥ јылына учурлалып, кандык айдыҥ 3-чи кӱнинде Улаган јурттыҥ Культура туразында јыргалду айалгада ӧтти.

Мында тоомјылу айылчылар, јаан јашту артисттердиҥ бала-баркылары, јуук улузы, аҥылу јуучыл операцияныҥ туружаачылары туруштылар.

Эҥ озо аймактыҥ администрациязыныҥ јааныныҥ социальный политика аайынча ордынчызы Л.Е. Кудюшева бойыныҥ ла аймактыҥ администрациязыныҥ јааны А.К. Акчинниҥ адынаҥ, «Улаган аймактыҥ эл-јонын јонјӱрӱмдик јӧмӧӧр башкартузыныҥ» директоры А.А. Санаа залда јуулгандарды јууктап јаткан Јеҥӱниҥ 79-чы, аймакта ветерандар ла пенсионерлердиҥ Соведи тӧзӧлгӧниниҥ бери 55 јылдыктарыла јылу уткуп, аймактыҥ јаан јаштуларыныҥ Совединиҥ председатели А.Б. Кончубаевага кӧп јылдардыҥ туркунына једимдӱ ижи учун Кӱндӱлӱ грамота, Быйанду самара ла сыйлар табыштырдылар.

Байрамдык айалганы улалтып, Александра Байрымовна бӱгӱн аймактыҥ ветерандарыныҥ Соведине Ада-Тӧрӧл учун Улу јууныҥ туружаачыларыныҥ тул арткан 2 эш-барааны, тылыҥ ишчилери - 12, јуу ӧйиниҥ балдары – 107, олордыҥ ортозында јаан катан јашту (90 јаштаҥ ӧрӧ) – 18 кижи кирип турганын кӧрӧӧчилерге јетирип, эрчимдӱ, тыҥытту каргандарды сыйларла темдектеди.

Ээчиде Балыктујул, Чибилӱ, Улаган јурт јеезелердиҥ јаандары Д.В. Тадышева, Г.И. Санин, Р.Е. Мамин, Саратанныҥ јурт байзыҥныҥ јааны А.Е. Тойдонова сценада бойлорыныҥ уткуулду сӧстӧрин база айдып, јерлештерине «Участнику специальной военной операции» деп медальдарла Юрий Юрьевич Ортонуловты, Алексей Георгиевич Токоековты, Вячеслав Витальевич Санинди, Геннадий Андреевич Бурмаловты, Станислав Владимирович Меҥдешевти, Дмитрий Александрович Кобеновты, «За ратную доблесть» кайралдарла Айас Владимирович Манзыровты, Владимир Артурович Менкоевти кайралдадылар.

Јаан јаштулардыҥ кӧрӱ-ойынын культураныҥ ветераны Мария Петровна Олчонова, ӱредӱниҥ ветераны Валерий Михайлович Адагызов, «Улаган аймактыҥ эл-јонын јонјӱрӱмдик јӧмӧӧр башкартузыныҥ» јааныныҥ ордынчызы Тамара Самсоновна Чугулова бааладылар.

Бу јорук конкурста ветерандардыҥ алты ӧмӧлиги турушкан: «Эҥир јылдыс» (Улаган), «Чедирген» (Балыктујул), «Таҥдак» (Чибит), «Чалын» (Саратан), «Тана» (Акташ) ла «Кӧк-Таман» (Улаган). Олор Ада-тӧрӧл учун Улу јуу ӧйиндеги шыралу, ачына јӱрӱмди кӧргӱзип, јуу ӧйиниҥ тӧрӧлчи кӱӱн-тапту кожоҥдорын, бијелерин јуу ӧйиниҥ балдарына, аҥылу јуучыл операцияда јеҥ јастанган јерлеш јуучылдарга учурлаган болды.

Конкурстыҥ уч-турултазыла баштапкы јерди «Таҥдак» јайаандык ӧмӧлик алды. Экинчи јерде - «Эҥир јылдыс». Ӱчинчи јерди «Тана» ла «Чалын» ӧмӧликтер ӱлештилер. Тӧртинчи јерде - «Кӧк-Таман», «Чедирген».

Конкурстыҥ јеҥӱчилдери керегинде айдар болзобыс, «Таҥдак» 2005 јылда Валерий Иванович Тойлоновтыҥ баштаҥкайыла тӧзӧлгӧн. Ол тушта аймактарда, јурттарда ветерандардыҥ ӧмӧликтерин тӧзӧӧр деп курч некелте болгон. Баштапкы кӱннеҥ ала эмдиге јетире «Таҥдактыҥ» башкараачызы – Александра Петровна Пупкова. Ол ойдӧҥ бери ол кӧп байрам-концерттердиҥ, конкурстардыҥ туружаачызы. 2019 јылда республикан кеминде ӧткӱрилген «Алтын кӱс» деген фестивальда «Вокал» деген номинацияда баштапкы јерге чыккан. 19 јылдыҥ туркунына ол бойын нак, кожоҥды сӱӱген ӧмӧлик деп кӧргӱзип, аймактыҥ культура тӱӱкизинде иле изин артыргызып салган.

Просмотров: 10